Kućanskim poslovima do savršene linije

0

Nemate vremena da idete u teretanu ili na aerobik? Nije problem! Iskoristite redovne kućanske poslove da biste potrošili višak unesenih kalorija.

 

Čišćenje podova

Čišćenjem ili ribanjem podova ćete izgubiti oko 120 kalorija za pola sata. U isto vrijeme vježbate i gornji i donji dio tijela. Skoncentrišite se prvo na prljavije djelove poda gdje ćete utrošiti više snage pa tek onda pređite na lakše. Ako osjetite “lagani” umor u rukama, ramenima ili u butinama, to je znak da je “trening” bio dobar.

 

Krečenje zidova

Krečenjem unutrašnjih prostorija u vašem domu kao i sređivanjem njegovog eksterijera za samo sat vremena možete sagorjeti 357 kalorija. Konstantno dohvatanje stvari, čučnjevi, istezanje te pritiskanje samo su neki od pokreta koje ovdje izvodite. Oni odlično utiču na zatezanje cijelog tijela, a posebno na ramena i butine.

 

Rad u bašti

Sakupljanje ukusnih plodova vašeg rada nije sve što dobijete od ovog posla. Nošenjem kanti punih vode, džakova sa đubrivom i radom sa baštenskim alatkama jačate bicepse. Stalnim čučnjevima i iskorakom prilikom zasađivanja ili ubiranja plodova zatežete noge, a posebno butine. Za sat vremena rada u bašti ćete sagoriti 357 kalorija.

 

Košenje travnjaka

Rad sa kosilicom na guranje utiče na gornji dio tijela. Stalno guranje jača mišiće ruku, ali i vaša leđa i trbušne mišiće. Ovo je posao koji će vas brzo oznojiti tako da morate voditi računa da pijete dovoljno vode u toku rada. Za sat vremena košenja potrošićete 476 kalorija.

 

 Usisavanje

Za pola sata usisavanja izgubićete 90 kalorija. Možda vam se ne čini mnogo, ali isto biste izgubili i za 15 min kik-boksa. Usisavanjem angažujte mišiće nogu, ruku i ramena.

 

Čišćenje kupatila

Čišćenjem kupatila za pola sata ćete potrošiti 200 kalorija. U isto vrijeme ćete angažovati mišiće ruku, ramena, leđa kao i mišiće nogu.

 

Peglanje

Za pola sata peglanja potrošićete 70 kalorija i zategnuti mišiće gornjeg dijela tijela. Ispravite leđa i čvrsto uhvatite peglu. Pokušajte da ne peglate cijelo vrijeme samo jednom rukom. Promijenite ruku da biste jednako zategnuli obje.

 

Penjanje uz stepenice

Iako ovo ne spada u kućne poslove, dobro je znati kako iskoristiti to što živite u stambenoj zgradi. Naime, 30 minuta hodanja po stepenicama (i penjanje i silaženje) će sagorjeti oko 285 kalorija. Trening je idealan za učvršćivanje nogu, a pogotovo zadnjice.

Autor: minimagazin.info

Sviđa vam se članak? Onda pogledajte i ovo: